នារសៀលថ្ងៃសុក្រ ទី១៤ ខែមីនា ឆ្នាំ២០២៥ គណៈកម្មការផែនការ វិនិយោគ កសិកម្ម រុក្ខាប្រមាញ់នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយម (គណៈកម្មការទី៣) ដឹកនាំដោយឯកឧត្តមបណ្ឌិត ម៉ុង ឫទ្ធី ប្រធានគណៈកម្មការទី៣ព្រឹទ្ធសភា និងមានការអញ្ជើញចូលរួមពីសមាជិក ក្រុមសមាជិកព្រឹទ្ធសភាប្រចាំភូមិភាគទី៧ បានអនុញ្ញាតឱ្យគណៈប្រតិភូជាន់ខ្ពស់ក្រុមហ៊ុនចិន DIMENG GROUP និងសហការី ដឹកនាំដោយលោក Wang Zhi Heng អគ្គនាយកក្រុមហ៊ុន DIMENG GROUP ចូលជួបពិភាក្សាការងារ និងសម្តែងការគួរសម នៅសាលប្រជុំពិសេស៣ វិមានព្រឹទ្ធសភា។
ជំនួបខាងលើនេះ ក្នុងបំណងសិក្សាទីផ្សារ លក់ទិញ ជីធម្មជាតិ និងជីគីមី ព្រមទាំងពិនិត្យសិក្សា ស្វែងរកទីតាំងដីសម្រាប់សាងសង់រោងចក្រផលិតជី នៅក្នុងព្រះរាជាណាចក្រកម្ពុជា។
ក្នុងឱកាសជំនួបពិភាក្សានោះ ក៏មានការអញ្ជើញចូលរួមពីតំណាងអាជីវករលក់ ចែកចាយជី តំណាងកសិករ មកពីបណ្តាខេត្ត ក្រុងនានាចំនួន៣២នាក់ ចូលរួមមតិយោបល់យ៉ាងច្រេីនផុលផុសផងដែរ។ ជាមួយគ្នានោះ លោក Wang Zhi Heng បានសន្យាជាឱឡារិកថានឹងសម្រេចចិត្តបោះទុនវិនិយោគដំបូងប្រមាណជា១២លានដុល្លារ សម្រាប់សាងសង់រោងចក្រផលិតជី ដែលមានកម្លាំងផលិត ១០មុឺនតោន ក្នុងមួយឆ្នាំៗ៕
ប្រភព៖ នាយកដ្ឋានព័ត៌មាន
